ኢትዮጵያ ቁጥራቸው ስድስት ሺ ለሚገመት የዕፅዋት ዝርያዎች መገኛ ስትሆን አስር በመቶ ለሚሆኑት ደግሞ በዚችው ሀገር ብቻ መገኛቸውን ላደረጉ ብርቅዬ ዕፅዋት መኖሪያም ነች፡፡ ይህ ደግሞ ሀገሪቱን የአለም የዕፅዋት ዝርያና የሰው ልጅ ለምግብነትና ለሌሎች የዕለት ተዕለት ፍጆታው የሚጠቀምባቸው አዝርዕት ምንጭነት ወይም መነሻ ማዕከል እንድትሆን የሚያደርጋት ዕውነታ ነው፡፡ ለሀገራችን በአይነቱ የመጀመሪያው የሆነውና በዘርፉ ምሁራን እንዲቋቋም ብዙ ውጣውረድ የተደረገበት የጉለሌ የዕፅዋት ማዕከልም በውስጡ ከ240 በላይ ሀገር በቀል የዕፅዋት ዝርያዎችን የያዘ ሲሆን 30 የሚሆኑት ደግሞ የሀገራችን ብርቅዬ ዕፅዋት መሆናቸውን ቀደም ብሎ የተደረገ ጥናት አመላክቷል፡፡ ማዕከሉ እስካሁን ካከናወናቸው በርካታ የእንክብካቤ፣የምርምርና የማሰባሰብ ተግባራት ላይ ተመርኩዘን በቀጣይ በምናደርጋቸው ጥልቅ ጥናቶች ይህ ቁጥር እንደሚጨምር እምነታችን ነው፡፡ በመሆኑም የማዕከሉን ዋናዋና አላማዎች ለማሳካት ወደ መሬት ማውረድ በሚገባን ተግባራት ዙሪያ የሚከተለውን ቁልፍ መልዕክት ማስተላለፍ እወዳለሁ፡፡ • የዕፅዋት ማዕከሉ ሊያሳካቸው ከተቋቋመባቸው ዋና ዓላማዎች አንዱ የሆነው የምርምር ዘርፍ ነው፡፡ ምርምር የዕፅዋት ብዝሀ-ህይወት ሀብታችንን ለመጠበቅ በሎም ለሚቀጥለው ትውልድ ለማስተላለፍ እንዲቻል በተፈጥሮ ወይም በማህበራዊ ሳይንስና ጥናት የምርምር ዘርፍ የተሰማሩ የማዕከሉም ሆነ የሌሎች ባለድርሻ አካላት ተመረማሪዎችን መሳብ ፤ • ጉለሌ የዕፅዋት ማዕከል በቀጣይ የሀገር በቀል ዕፅዋትን በማልማትና በማቅረብ በሎም የህብረተሰቡን ግንዛቤ በማስፋት ለአረንጓዴ ስፍራዎች ማስዋቢያነት ጥቅም ላይ እንዲውሉ የሚያስችሉ ሥራዎችን ማከነወን ፤ • የዕፅዋት ማዕከሉ በተለይ የመጥፋት አደጋ የተጋረጠባቸውን ሀገር በቀል ዕፅዋትን ከሌሎች የሚለዩበትን ተፈጥሮአዊ ባህሪ በማስገንዘብ ቀጣይነቱ የተረጋገጠና የተጠናከረ እንክብካቤና ጥበቃ እንዲደረግላቸው ማድረግ ፤ • ጉለሌ የዕፅዋት ማዕከል በሁሉም ደረጃ ላይ ለሚገኙ መምህራንና ተማሪዎች (ከመጀመሪያ ደረጃ አስከ ዩኒቨረሲቲ) የማዕከሉን ማራኪ መልካምድራዊ አቀማመጥ ለመመልከት ፣ የዕፅዋት ስነ-ህይወትን ፣ ነብሳትንና ስነ-ምድርን ወዘተ… የተመለከቱ ጥናትና ምርምሮችን ለማካሄድ የሚያስችል የመስክ ቤተሙከራ ሆኖ እንዲያገለግል ማስቻል ፤ • ደረጃውን የጠበቀ የኢኮቱሪዝም አገልግሎት የሚሰጥ በተፈጥሮአዊ መስህበነቱና ከብክለት ነፃ የሆነ ንፁህ አየር መገኛ እንዲሆን በማስቻል ለከተማችን ነዋሪዎች፣ለሀገር ውስጥና ለውጭ ሀገር ጎብኚዎች ተመራጭ መዳረሻ የዕፅዋት ማዕከል ማድረግ፤ • ለሌሎች የሀገራችን ከተሞችና ዩኒቨረሲቲዎች ተምሳሌታዊ የዕፅዋት ማዕከል በመሆን የራሳቸውን የዕፅዋት ማዕከል ለማቋቋም የሚያስችል ድጋፍ ለመስጠት ናቸው፡፡ከዘህ በላይ የተዘረዘሩት ዋናዋና ጉዳዮች የጉለሌ የዕፅዋት ማዕከል በቀጣይ ትኩረት ሰጥቶ የሚያከናውናቸው ሥራዎች መሆናቸውን በዚሁ አጋጣሚ እየገለፅኩ ለስኬታማነታቸው የከተማው አስተዳደር ፣ የማዕከሉ ማኔጅመንትና ሠራተኞች እንዲሁም ባለድረሻ አካላት ለሚያደረጉት ያልተቆጠበ ጥረት ከወዲሁ በራሴና በጉለሌ የዕፅዋት ማዕከል ስም ማመስገን እወዳለሁ፡፡